12 ജില്ലകളിലെ 28 തദ്ദേശ വാർഡുകളിൽ ഉപതെരഞ്ഞെടുപ്പ് ഫെബ്രുവരി 28ന്; വോട്ടെണ്ണൽ മാർച്ച് ഒന്നിന്
തിരുവനന്തപുരം: ഇടുക്കി, കാസർകോട് ഒഴികെ 12 ജില്ലകളിലെ 28 തദ്ദേശ വാർഡുകളിൽ ഫെബ്രുവരി 28ന് ഉപതെരഞ്ഞെടുപ്പ് നടത്തുമെന്ന് സംസ്ഥാന തെരഞ്ഞെടുപ്പ് കമീഷണർ എ. ഷാജഹാൻ അറിയിച്ചു. വിജ്ഞാപനം ഫെബ്രുവരി രണ്ടിന് പുറപ്പെടുവിക്കും. നാമനിർദേശ പത്രിക ഒമ്പത് വരെ സമർപ്പിക്കാം. സൂക്ഷ്മപരിശോധന 10ന് നടത്തും. 13 വരെ പത്രിക പിൻവലിക്കാം. മാർച്ച് ഒന്നിനാണ് വോട്ടെണ്ണൽ.
23 ഗ്രാമപഞ്ചായത്ത് വാർഡുകൾ, രണ്ട് മുനിസിപ്പാലിറ്റി വാർഡുകൾ, കൊല്ലം കോർപറേഷനിലെ മീനത്തുചേരി വാർഡ്, പാലക്കാട് ജില്ല പഞ്ചായത്തിലെ ആലത്തൂർ വാർഡ്, തൃശ്ശൂർ തളിക്കുളം ബ്ലോക്ക് പഞ്ചായത്തിലെ തളിക്കുളം വാർഡ് എന്നിവിടങ്ങളിലാണ് ഉപതെരഞ്ഞെടുപ്പ് നടക്കുക.
ഇതോടനുബന്ധിച്ച് മാതൃകാ പെരുമാറ്റച്ചട്ടം നിലവിൽ വന്നു. ജില്ല, ബ്ലോക്ക് പഞ്ചായത്ത് വാർഡുകളിൽ ഉൾപ്പെടുന്ന ഗ്രാമപഞ്ചായത്ത് പ്രദേശത്ത് മുഴുവൻ പെരുമാറ്റച്ചട്ടം ബാധകമായിരിക്കും. കോർപ്പറേഷൻ, മുനിസിപ്പാലിറ്റികളിൽ അതാത് വാർഡുകളിലും ഗ്രാമപഞ്ചായത്തുകളിൽ മുഴുവൻ വാർഡുകളിലുമാണ് ബാധകം.
