ഒന്നു മുതൽ ഒമ്പതു വരെ ക്ലാസുകളിൽ ഓൾ പ്രമോഷൻ തുടരും
തിരുവനന്തപുരം: സംസ്ഥാനത്ത് ഒന്നു മുതൽ ഒൻപതു വരെ ക്ലാസുകളിൽ ഇക്കുറിയും ഓൾ പ്രമോഷൻ തുടരുമെന്ന് വിദ്യാഭ്യാസ വകുപ്പ്. വിശദമായ പഠനത്തിനുശേഷം മാത്രമേ മൂല്യനിർണയ രീതി മാറ്റുന്ന കാര്യം പരിഗണിക്കൂ. കുട്ടികളുടെ അക്കാദമിക നിലവാരം ഉയർത്താനുള്ള പ്രവർത്തനം ഊർജിതമാക്കുമെന്നും വിദ്യാഭ്യാസ മന്ത്രി വി. ശിവൻകുട്ടി മീഡിയവണ്ണിനോട് പറഞ്ഞു.
എസ്.എസ്.എൽ.സി ഫലപ്രഖ്യാപന ദിനത്തിലായിരുന്നു പത്താം ക്ലാസ് മൂല്യനിർണയം പരിഷ്കരിക്കുന്നതിനെക്കുറിച്ചുള്ള തീരുമാനം മന്ത്രി അവതരിപ്പിച്ചത്. ഒമ്പത് വരെയുള്ള ക്ലാസുകളിലൂം മാറ്റം ആലോചിക്കുന്നുണ്ടോ എന്ന ചോദ്യത്തിന് വിഷയം പരിഗണനയിലുണ്ട് എന്നായിരുന്നു മറുപടി.
എന്നാൽ, ഇക്കുറിയും ഒമ്പത് വരെ ക്ലാസുകളിൽ വിദ്യാഭ്യാസ അവകാശ നിയമപ്രകാരം എല്ലാവരെയും വിജയിപ്പിക്കുന്നത് തുടരുമെന്ന് സ്ഥിരീകരിക്കുകയാണ് മന്ത്രി. എസ്.എസ്.എൽ.സി ഒഴികെ മറ്റു ക്ലാസുകളിലെ മൂല്യനിർണയത്തിൽ മാറ്റം കൊണ്ടുവരുന്ന കാര്യം പരിഗണനയിലില്ല. വിദ്യാർഥികളുടെ അടിസ്ഥാനശേഷി ഉയർത്തുന്ന തരത്തിലുള്ള പഠനരീതി ആവിഷ്‌കരിക്കുമെന്നും വിദ്യാഭ്യാസ മന്ത്രി വി. ശിവൻകുട്ടി പറഞ്ഞു.
മാറുന്ന ലോകത്തിനൊപ്പം അധ്യാപകരുടെ ഇടപെടലുകളിലും മാറ്റം വേണമെന്ന അഭിപ്രായം വിദ്യാഭ്യാസ വകുപ്പിനുണ്ട്. അതുകൊണ്ടാണ് ഈ അക്കാദമിക വർഷം ആരംഭിക്കുന്നതിന് മുന്നോടിയായി ശില്പശാലകൾ വഴി എല്ലാ അധ്യാപകർക്കും പരിശീലനം ഉറപ്പാക്കിയത്. ഇനി മുതൽ വർഷാവർഷം പാഠപുസ്തകങ്ങൾ പുതുക്കുന്ന തരത്തിലേക്ക് മാറാനാണ് വകുപ്പിൻ്റെ ശ്രമമെന്നും മന്ത്രി വ്യക്തമാക്കി.
