ഒരുരൂപക്ക് ഷൂ നൽകാമെന്ന് വാഗ്ദാനം; ആയിരങ്ങളൊഴുകി, തിക്കും തിരക്കും- പൊലീസ് ലാത്തിവീശി

കോഴിക്കോട്: ഒരു രൂപ നോട്ടുമായെത്തുന്നവർക്ക് ഷൂ നൽകാമെന്ന് വാഗ്ദാനം കേട്ട് കടയിലേക്ക് ആയിരങ്ങൾ ഒഴുകിയെത്തിയത് തിക്കിനും തിരക്കിനും പൊലീസ് ലാത്തിച്ചാർജിനും ഇടയാക്കി. കോഴിക്കോട് വൈക്കം മുഹമ്മദ് ബഷീർ റോഡിലെ ട്രെൻസ് ഫാക്ടറി എന്ന കടയുടെ ഉദ്ഘാടനത്തിനിടെയാണ് സംഘർഷം.

കടയുടെ ഉദ്ഘാടനത്തിനെത്തിയവർക്ക് നേരെ പൊലീസ് ലാത്തിവീശി. ഉദ്ഘാടനം കാണാനെത്തിയവരുടെ തിക്കും തിരക്കുമാണ് സംഘർഷത്തിൽ കലാശിച്ചത്. സംഭവത്തിൽ കടയുടമയെ പൊലീസ് കസ്റ്റ്‍ഡിയിലെടുത്തു. ഉദ്ഘാടന ദിവസം ഒരു രൂപക്ക് ചെരുപ്പ് നൽകാമെന്ന വാഗ്ദാനം നൽകാമെന്ന കടയുടമയുടെ സമൂഹമാധ്യമത്തിലെ പോസ്റ്റ് കണ്ട് ഉദ്ഘാടനത്തിന് അതിരാവിലെ തന്നെ വലിയ ജനക്കൂട്ടം എത്തിയത്. ഉദ്ഘാടനത്തിനായി കട തുറന്ന സമയത്ത് ആളുകൾ കടയിലേക്ക് ഇരച്ചുകയറുകയും അനിയന്ത്രിതമായ തിരക്കനുഭവപ്പെടുകയും ചെയ്തതോടെ കടയുടമ തന്നെയാണ് പൊലീസിൽ വിവരമറയിച്ചത്. തുടർന്ന് പൊലീസ് സ്ഥലത്തെത്തിയിട്ടും ജനങ്ങൾ ഒഴിഞ്ഞുപോകാതായതോടെ ലാത്തിവീശുകയായിരുന്നു.