ഡൽഹിയിൽ കോൺഗ്രസും എഎപിയും ഒരുമിച്ച് മത്സരിക്കണമായിരുന്നു: അമർത്യ സെൻ
കൊൽക്കത്ത: പരസ്പര സമ്മതത്തോടെ ഡൽഹി തെരഞ്ഞെടുപ്പിൽ കോൺഗ്രസും ആം ആദ്മി പാർട്ടിയും ഒരുമിച്ച് മത്സരിക്കണമായിരുന്നുവെന്ന് സാമ്പത്തിക ശാസ്ത്രജ്ഞനും നോബൽ സമ്മാന ജേതാവുമായ പ്രഫ. അമർത്യ സെൻ. പിടിഐക്ക് നൽകിയ അഭിമുഖത്തിലാണ് ഇരുപാർട്ടികൾക്കും ഇടയിൽ ഐക്യം വേണമായിരുന്നുവെന്ന നിലപാട് അദ്ദേഹം വ്യക്തമാക്കിയത്.AAP
രാജ്യത്ത് മതേതരത്വം നിലനിൽക്കണമെങ്കിൽ ഐക്യം മാത്രമല്ല, ഇന്ത്യയെ ബഹുസ്വരതയുടെ മികച്ച മാതൃകയാക്കി മാറ്റിയ കാര്യങ്ങളിൽ യോജിപ്പും ഉണ്ടായിരിക്കണമെന്ന് സെൻ പറഞ്ഞു. ഡൽഹി തെരഞ്ഞെടുപ്പ് ഫലം അതിശയോക്തിപരമായി കാണേണ്ടതില്ല. പക്ഷേ അതിന് തീർച്ചയായും അതിന്‍റേതായ പ്രാധാന്യമുണ്ട്.
ഡൽഹിയിൽ ഹിന്ദുത്വ അധിഷ്ഠിത സർക്കാർ വേണ്ടെന്ന് ആഗ്രഹിക്കുന്നവർക്കിടയിലെ ഐക്യത്തിന്‍റെ അഭാവമാണ് ആം ആദ്മി പാർട്ടിയുടെ തോൽവിക്ക് പ്രധാന കാരണം. പല സീറ്റുകളിലെയും കണക്കുകൾ പരിശോധിച്ചാൽ, ആം ആദ്മി പാർട്ടിയെക്കാൾ ബിജെപിയുടെ ഭൂരിപക്ഷം വളരെ കുറവാണ്. ചിലപ്പോൾ കോൺഗ്രസിന് ലഭിച്ച വോട്ടുകളേക്കാൾ അത് കുറവായിരുന്നുവെന്നും സെൻ പറഞ്ഞു.
ആം ആദ്മി പാർട്ടിയുടെ നയത്തെക്കുറിച്ചുള്ള വ്യക്തതയെയും അദ്ദേഹം ചോദ്യം ചെയ്തു. ആം ആദ്മി പാർട്ടിയുടെ പ്രതിബദ്ധതകൾ എന്തായിരുന്നു? ആം ആദ്മി പാർട്ടി ഉറച്ച മതേതരമാണെന്നും എല്ലാ ഇന്ത്യക്കാർക്കും വേണ്ടിയുള്ളതാണെന്നും വ്യക്തമാക്കുന്നതിൽ വിജയിച്ചുവെന്ന് ഞാൻ കരുതുന്നില്ല. ഹിന്ദുത്വത്തിന് വളരെയധികം പ്രചാരം ലഭിച്ചു. അപ്പോൾ മതപരമായ വർഗീയതയ്‌ക്കെതിരെ അത് എത്രത്തോളം പ്രതിബദ്ധതയുള്ളതായിരുന്നുവെന്ന് പോലും വ്യക്തമല്ല. ആം ആദ്മി പാർട്ടി അതിൽ വ്യക്തമായ നിലപാട് സ്വീകരിച്ചില്ലെന്നും സെൻ വ്യക്തമാക്കി.
അതേസമയം, സ്കൂൾ വിദ്യാഭ്യാസത്തിലും ആരോഗ്യ സംരക്ഷണത്തിലും ആം ആദ്മി പാർട്ടി നടത്തിയ പ്രവർത്തനങ്ങളെ അദ്ദേഹം പ്രശംസിച്ചു. കൂടാതെ ഈ വിഷയങ്ങളിൽ കോൺഗ്രസ് അവർക്കൊപ്പം നിൽക്കേണ്ടിയിരുന്നുവെന്നും അദ്ദേഹം അഭിപ്രായപ്പെട്ടു.
തന്‍റെ മകൾ ഡൽഹിയിലാണ് താമസം. അവളും കുടുംബവും സ്കൂൾ വിദ്യാഭ്യാസം, ആരോഗ്യ സംരക്ഷണം എന്നീ മേഖലകളിലെ ആം ആദ്മി പാർട്ടിയുടെ ശ്രമങ്ങളെ പ്രശംസിക്കുന്നു. കോൺഗ്രസിന് ആം ആദ്മി പാർട്ടിയുമായി ഒന്നിച്ചുനിന്ന്, ‘ഞങ്ങൾക്ക് അവരുടെ സ്കൂളുകൾ ഇഷ്ടമാണ്, ഞങ്ങൾക്ക് അവരുടെ ആശുപത്രികൾ ഇഷ്ടമാണ്, ഞങ്ങൾ അവ വികസിപ്പിക്കാൻ ആഗ്രഹിക്കുന്നു, അതിനപ്പുറം പോകണം’ എന്ന് പറയാമായിരുന്നു. അത് നിലവിൽ എടുത്തതിനേക്കാൾ മികച്ച ഒരു വഴിത്തിരിവാകുമായിരുന്നു. മതേതരത്വം, ആരോഗ്യ സംരക്ഷണം, എല്ലാവർക്കും വിദ്യാഭ്യാസം എന്നീ വിഷയങ്ങളിൽ ആം ആദ്മി പാർട്ടി കൂടുതൽ ശ്രദ്ധ കേന്ദ്രീകരിച്ച്, ഈ കാര്യത്തിൽ കോൺഗ്രസുമായി കൈകോർക്കാൻ കൂടുതൽ ശ്രമിക്കാമായിരുന്നുവെന്നും സെൻ കൂട്ടിച്ചേർത്തു.
