കനത്ത മഴ: ഇന്ന് ഏഴ് ജില്ലകളിൽ അവധി
കോഴിക്കോട്: സംസ്ഥാനത്ത് വീണ്ടും കാലവർഷം കനക്കുന്നു. ഇന്ന് അതിതീവ്ര മഴയ്ക്ക് സാധ്യതയെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. കനത്ത മഴ തുടരുന്ന സാഹചര്യത്തിൽ വയനാട്ടിലും വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചതോടെ നിലവിൽ ഏഴ് ജില്ലകളിൽ മഴ അവധിയുണ്ട്
ഇന്ന് രാവിലെയാണ് വയനാട്ടിൽ അവധി പ്രഖ്യാപിച്ചത്. കാസർകോട്, കണ്ണൂർ, കോഴിക്കോട്, മലപ്പുറം, എറണാകുളം, തൃശൂർ ജില്ലകളിൽ ഇന്നലെ തന്നെ കലക്ടർമാർ അവധി പ്രഖ്യാപിച്ചിരുന്നു. കാസർകോട് ഒഴികെ എല്ലാ ജില്ലകളിലും മുഴുവൻ വിദ്യാഭ്യാസ സ്ഥാപനങ്ങൾക്കും അവധിയാണ്. കാസർകോട് കോളജുകൾക്ക് അവധി ബാധകമല്ല.
അതിതീവ്ര മഴയ്ക്കുള്ള സാധ്യത മുൻനിർത്തി മലപ്പുറം കണ്ണൂർ കാസർഗോഡ് ജില്ലകളിൽ ഇന്ന് റെഡ് അലർട്ട് നൽകിയിട്ടുണ്ട്. എറണാകുളം തൃശൂർ പാലക്കാട് കോഴിക്കോട് വയനാട് ജില്ലകളിൽ ഓറഞ്ച് മുന്നറിയിപ്പും തിരുവനന്തപുരം കൊല്ലം ഒഴികെയുള്ള ജില്ലകളിൽ യെല്ലോ മുന്നറിയിപ്പുമാണ്. കാലവർഷക്കാറ്റ് ശക്തി പ്രാപിക്കുന്നതും ന്യൂനമർദ പാത്തിയും ചക്രവാതച്ചുഴിയുമാണ് കേരളത്തിലെ മഴയ്ക്ക് കാരണം.
ഇതിനിടെ കനത്ത മഴയെ തുടർന്ന് എറണാകുളം ചെമ്പുമുക്ക് ആട്ടിപ്പേട്ടി നഗർ റോഡ് ഇടിഞ്ഞു. രണ്ട് മാസം മുമ്പ് പണി പൂർത്തിയായ റോഡിന്റെ ഇടപ്പള്ളി തോടിനോട് ചേർന്നുള്ള ഭാഗമാണ് ഇടിഞ്ഞത്.
