ദുരിതയാത്രയ്ക്ക് അറുതിയില്ല; ഇടമലക്കുടിയിൽ രോഗിയെ കമ്പിൽ തുണിക്കെട്ടി ചുമന്ന് ആശുപത്രിയിൽ എത്തിച്ചു

ഇടുക്കി: ഇടമലക്കുടിയിൽ രോഗിയുമായി വീണ്ടും ദുരിത യാത്ര. രോഗിയെ ആശുപത്രിയിൽ എത്തിച്ചത് കമ്പിൽ തുണിക്കെട്ടി ചുമന്ന്കൊണ്ട്. വളയംപാറ കുടിയിലെ പൂമണിയെയാണ് സൊസൈറ്റികുടിയിലെ ആശുപത്രിയിൽ എത്തിച്ചത്. പൂമണി കഴിഞ്ഞ കുറച്ചധികം ദിവസമായി പനി ബാധിച്ച് കിടപ്പിലായിരുന്നു. ഏകദേശം ആറ് കിലോമീറ്ററോളമാണ് വയോധികനെയും ചുമന്ന് നാട്ടുകാർ ആശുപത്രിയിലേക്ക് എത്തിച്ചത്. കമ്പിൽ തുണികൊണ്ട് കെട്ടി മഴ നനയാതിരിക്കാനായി പ്ലാസ്റ്റിക്ക് ഷീറ്റുകൊണ്ട് മറച്ചാണ് പൂമണിയെ നാട്ടുകാർ ആശുപത്രിയിൽ എത്തിച്ചത്.